絲絲講場：銀行請CEO要經金管？
金融海嘯加上「Libor門」操控事件，英美銀行行政總裁（CEO）向公眾道歉同落台次數，絲絲已經數都數唔晒。
為咗加強企業管治，金管局亦都乘勢修訂《銀行業條例》嘅企業管治部分，第日銀行委任CEO時，呢位CEO可能要去金管局嗰度面試完先至會獲批。
有呢個改動，一切源於巴塞爾委員會，佢哋唔單止制定資本同流動性要求，仲有好多瓣嘢做，例如銀行披露資料同企業管治咁，金管局就根據《銀行業條例》改監管手冊。
金管局助理總裁（銀行操守）戴敏娜尋日就發咗封通函畀銀行，交代吓啲轉變，絲絲睇到最重要嗰部分，就係金管局如果覺得有需要，會同銀行委任嘅董事局成員同CEO會面，睇下佢係咪適合新職位，甚至可能要見埋現任嘅董事同埋高級管理層。
香港有成百幾間銀行，仲要未計有限制持牌銀行同埋接受存款公司，如果間間調任吓CEO同董事都要去見金管局，就真係會好唔得閒。
行內知名可免面試
金管局發言人就話，要唔要見面視乎銀行規模、重要性、人選背景等，如果一直有合作開，知道對方熟悉銀行同金融，唔係一定要見完面先批，即係話熟絡嘅就免面試，本地薑同內部晉升嘅賓架（Banker）應該唔使去IFC金管局總部，過江龍就麻煩少少，不過，如果對銀行穩定有幫助嘅，大家行多步囉！
余詩韻