有位內地股癡，自內地股市開張至今，和股市難解難分，贏過輸過、痛過傷過、甚至死（心）過翻生，心頭總難撇開對股市的牽掛。難怪有人說，股票能讓人上鴉片癮，你賺了錢想念它，虧了錢也想念它。股癡現在也是沉浸於想念而已，因全副身家「艇」在股市裏，已再無操作本錢。
原本股癡很介意股市輸錢，但朋友或難免問起，都只以「輸少少」回應，決不直認輸錢慘情。近期他忽然轉性，對輸錢直認不諱，朋友估計是見周邊人都輸得幾大，於是不必自認高人一截。
股癡私下表白，實情並非僅限於此。他認為，睇勻世界許多神級大師都輸得難睇，自己小股民一名怕乜認衰。還有大到不能倒的中投，旗下專家如雲都屢戰屢敗，樓繼偉都不嫌羞家，自己有乜唔好意思？
股癡又揶揄外匯管理局「識做」，以前外匯局主力自己揸旗投資，幾年前開始假手於人，借私募基金作投資渠道，近期又掟五億美元給黑石。表面理由是投資多元化，好重視分散風險，實際上假手於人也好過自己搞，衰咗只須承認所託非人之過失。
鍾經緯認為，股癡思維生動體現了「阿Q精神」，股場中只要大家都是輸家齊齊閉翳，心靈就得到極大安慰。股民潛意識更似是「寧可我獨贏，不可我獨輸」，頗得曹操「寧可我負天下人，不可天下人負我」真傳。
CHINA 鍾經緯