孖妹S檔案：十大泡沫邊個最恐怖？

環球十大爆炸性泡沫

1. 醫療泡沫

現時美國醫療成本佔其國內生產總值（GDP）的15%，該比例為所有發達國家之中最高，且將會進一步上升，醫療成本將拖累美國經濟。

2. 政府泡沫

《Bubble on the Potomac》特稿指出，大量借債的美國創造出其資本無法支撐的財富，這將讓美國付出代價。

3. CEO薪酬泡沫

據《彭博市場》雜誌報道，銀行CEO的薪酬於去年大漲20.4%，但大多銀行股卻出現下滑。

4. 不平等泡沫

美國的貧富懸殊差距在不斷擴大，一種顯而易見的趨勢是，收入和財富積聚在最富有人群手裏，中產階級被掏空，而社會低層的人則愈來愈窮。

5. 債務泡沫

大學畢業生被助學貸款壓得喘不過氣來，債務纏身迫使他們去賣漢堡包和咖啡，可見大學文憑值不了幾個錢，美國正在扼殺他們的競爭力。

6. 全球性失業泡沫

《時代》雜誌關注全球新「失業一代」問題，數千萬名年輕人沒有工作，人數超過「阿拉伯之春」和「佔領華爾街」運動的參與者，有人警告政府，這些人隨時掀起反資本主義革命。

7. 油價泡沫

新石油危機將再次引發「阿拉伯之春」。全球產油國的統治者正瀕臨油價大跌，其速度是自○八年發生金融海嘯以來不曾有過的。

8. 風險泡沫

○八年以來美國經濟一直處於疲弱的復甦狀態，原因在於歷史上最大的消費熱潮過後，美國消費者不願意再花錢。

9. 緩慢增長泡沫

財政緊縮將成為現實，投資回報較低將成為常態。經濟增長緩慢，只有部分股票板塊會溫和上漲，利率將維持在低位。

10. 資本主義泡沫

美國前國家安全顧問Brent Scowcroft在《重組的世界》寫道：過去，我們被看成是為了每一個人而傾盡所能的人；現在，我們則被視作只迷戀自己的特殊利益的一群人。這種短視願景反映出，很多政界人士以哲學家蘭德（Ayn Rand）的極端資本主義理念去治理國家的一種趨勢。

何：交通銀行（香港）經濟及策略師 何文俊

商：新鴻基尊尚資本管理投資策略師 商紹豪

高妹： Jeremy Grantham出晒名研究泡沫，佢喺二○○○年一月預測科網股泡沫爆破而成名，○七年又預測次按危機將出現，其後向市場發出「現金為王」訊號，終於佢逃過○八年金融海嘯一劫，而大部分投資者就身陷苦海至今。今次佢又再提出十大金融泡沫，係咪真o架？

美國恐陷長期衰退

　何： Grantham擅長用歷史數據去計算資產價格，亦係個價值投資者，只會買現價低於合理值嘅股票。我認同佢嘅睇法，但呢十個唔係泡沫，而係計時炸彈，爆咗當然好大鑊，但資本主義是指自由市場，擁有自我完善、調節嘅能力，重點係根本無人知道呢隻「無形之手」嘅力量會有幾大。不過呢啲炸彈幾時爆？就真係天知道喇。

　商： 大家經常講泡沫，但其實好難去為「爆破」作出定義，我覺得用現象去形容會好啲！十九世紀末美國開始興起消費主義，而第二次工業革命更令資本主義迅速發展，令當時美國經濟踏上起飛嘅軌道，加上「先使未來錢」成為美國人嘅消費觀念，經濟發展亦大大鼓勵及推動國民消費，終於累積無法償還嘅債務，其實現時美國係行緊日本長期經濟衰退嗰條舊路。

彩兒： 凡事有輕重，泡沫有大小。照你哋睇，邊啲泡沫爆咗最嚴重呢？

　何： 不平等泡沫爆咗都幾嚴重，經濟狀況好時，財富有流動空間，富者搵得更多錢，貧者亦都有飯開；但現時經濟咁差，有錢人就話流失財富，窮人可能係無咗個職位。當資源嚴重地分配不均，貧富嘅距離愈趨拉闊，低層嘅人就會反抗，造成社會動盪不安，通常呢段時間政府同企業都會變成同盟，引發示威或革命都仲好，最怕係民眾唔再相信政府及貨幣。

　商： 全球人口老化問題加劇，可見醫療泡沫不單止係美國受到影響，但醫療開支係必須的，美國要輸入具有生產力嘅精英人才，醫療等公共福利就一定要有。其實政府債務泡沫已經包括歐美，眾人都知道呢筆債根本還唔到，歐央行或者美聯儲所推出嘅救市工具亦如同廢物，實際效用卻十分有限，始終有一日，債務危機都係會爆。

高妹： 莎士比亞早已講過：「唔受監管嘅自由就係狂野。」○八年金融海嘯揭示資本主義「為利益而瘋狂」，難怪Grantham話：「資本主義既沒有道德，也沒有良心。」

利己主義迷信市場

　何： 資本主義一定係無道德、唔公平，因其核心價值係「利己主義」，深信自由市場有能力將有限資源發揮最有效率分配，將利益極大化，簡單啲講即本小利大。但當資本主義過度自由化，難免出現財富及權力分配不均情況，致貧富懸殊，於是衍生出不平等泡沫。

彩兒： 歐美奉行資本主義過百年，就因放任市場自由，終淪落如今下場，希望中國唔好有樣學樣。

　商： 與十年前比較，我覺得資本主義比較正面，對市場嘅反效果亦較少。但全球一體化、新興市場崛起、全球產能過剩等問題，令美國嘅消費需求遠超經濟增值，其資本主義開始走得不平衡。現時中國推行經濟改革，人民幣要走出去，港交所（00388）買LME（倫敦金屬交易所）就係爭取國際話語權，但中國與歐美嘅歷史背景有別，其資本主義反而充滿中國特色。

高妹、彩兒

若有料報畀高妹同彩兒或有嘢問，可電郵money.biz@opg.com.hk