近期大家議論紛紛，都係講緊二手居屋開放畀白表人士免補地價嘅影響。單睇上車盤同細價樓市場，大家有留意近期新聞，都會睇到成交量持續上升，小型屋苑更加係搶手貨。貨源掃吓掃吓，「市場購買力被釋放出嚟」似乎所言非虛！
要解決房屋問題，除增加供應外，的確應由舊居屋市場入手，但係力度可能有待加強。畢竟，要成功落成目前起緊嘅樓宇，都需花費三五七年。活化舊居屋有其必要，亦可以幫到唔少夾心階層。
九七年八萬五事件，係因緣際會而成。以前一個人頂幾層樓，依家呢種事情根本過唔到銀行按揭，皆因監管已經強咗好多。事實上，社會上私人住宅短缺嘅需求量，絕對多過政府提供嘅5,000名額，短期供應量冇可能驟然增多，樓價自必然繼續上升。大家睇到印花稅效力一過，近排樓市又開始暢旺起嚟？樓價依然係咁升。加上全球銀紙供應量大增，樓價上升某程度上只係反映通脹。香港有聯繫匯率，更加係雪上加霜；樓價向上嘅機會，依然大過向下。
如果大家問Prof. J，我會同大家講，依家樓價係好貴！但係種種原因會令樓價依然高踞不下！好似紐約、倫敦等大城市，其實都出現呢個現象！只不過香港唔似人哋咁大個城，買唔起市區樓嘅人可以住郊區。繼續追蹤，出發！
香港大學電子金融服務榮譽助理教授 徐燦傑