紐交所最大市場莊家之一Knight Capital，上個禮拜因為出現系統「技術問題」，不但導致148隻股份嘅交易受影響，仲搞到自己揸住成手蟹貨，畀華爾街班口痕友笑佢係「Knight-mare」（噩夢），間行喺最後關頭獲白武士注資4億美元救亡，雖然原有股東股權被大幅攤薄，但都算圓滿解決事件，總好過上年明富環球（MF Global）咁樣，依家仲未搞掂晒啲蘇州屎。
事過境遷，Knight出事當日嘅內幕陸續曝光，尋日《華爾街日報》就披露Knight高峰期揸住咗高達70億美元股票，雖然已即時沽貨減磅，但當日收市依然有淨長倉46億美元，埋單計損失達4.4億美元。
不過，今次最好彩嘅應該係私募基金黑石集團（Blackstone），據小道消息講，黑石喺Knight出事前曾經考慮將佢收購，仲話已經進行深入磋商添，只係差估值報告，單「刁」相信距離拍板落實不遠矣，而Knight出事後，股價由之前10.33美元插到落最低2.59美元，咁仲唔算佢執番身彩！
最出奇係黑石似乎對Knight情有獨鍾，佢亦係今次入股Knight嘅財團成員之一，相信係睇中Knight嘅江湖地位，間行係紐交所680隻股份嘅市場莊家，上年每日平均配對200億美元交易，如果因一次「意外」而沒頂，未免太過可惜。