豪派300萬美元獎金
不過絲絲勢估唔到百度公司創始人李彥宏都會咁大頭蝦。李彥宏上月24日向全體員工通發第二季度總結郵件，可能一時手快快，唔記得寫標題，即時畀全體員工捉到正。百度員工難得捉到老闆痛腳，點會咁輕易放過老闆，喺公司內網嘈住要老細請食雞翼，難得佢又肯「牙齒當金使」，回覆員工話佢一定會請客。
今個星期三，百度搞summer party，李彥宏與一眾百度員工同樂，佢仲兌現「請客」承諾，現場大派雞翼畀各位員工。除咗有雞翼食，李彥宏仲大派300萬美元獎金畀三個基層小團隊，表揚佢哋一年內喺公司重大項目中不斷創新同突破，計落獲獎員工每人都有成68萬元獎金，認真飲得杯落！