雷士照明（02222）內部權鬥天天新款，騰訊財經尋日爆料，引述雷士董事長閻焱，話作為股東之一嘅施耐德代表兼雷士照明現任CEO張開鵬，喺飽受巨大壓力之下，好可能會提出辭職。
絲絲心諗，張總喺商場打滾多年，稱得上歷盡風浪，等閒壓力點會放在眼內？唔通張總另有難言之隱？
閻總又補充，就算張總離職，唔代表會畀前任CEO吳長江回歸雷士，之前佢所提出吳長江回歸雷士要滿足嘅三大條件仍然不變。
兩大陣營已經鬥咗一段時間，今日係關鍵日子，皆因雷士經銷商同埋員工代表早前提出要畀吳長江回歸，仲限閻焱最遲今日回覆。
閻總都唔係省油嘅燈，佢已經講到明，唔會理會所謂限期前回覆。喺呢場「攻心計」之中，究竟雙方陣營下一步會出啲咩招數呢？