絲絲講場：屈宏斌：救市如愛情冇永恒
「風水輪流轉」，依家中國傷風，全球會大感冒，○九年中國四萬億救市，幫咗環球經濟一把，家陣全球經濟危危乎，中國應否再加大投資救經濟，又成為討論焦點。滙豐大中華區首席經濟師屈宏斌對呢個議題自有佢嘅觀點，但借愛情觀嚟論述，又幾有新意，起碼吸引到絲絲嘅眼球。佢認為世界上冇嘢係永恒，正如愛情都冇永恒，仲斷言中國遲早有一日唔會以投資刺激經濟添！
屈宏斌平時習慣喺微博發表觀點，既然用得愛情觀嚟比喻投資，倒不如喺微博開個欄講愛情觀，點知佢竟然話自己不懂愛情！雖然絲絲平時好認同屈宏斌嘅觀點，但點都唔肯相信，愛情冇永恒！
人所共知，中國經濟有下行風險，市場對內地推出嘅救市策略亦有不同揣測，但總離唔開減息、減存款準備金率，同埋加大投資力度等。
目前仍有基建需求
屈宏斌講咗大半日，都講緊中國目前有需要以投資刺激經濟，尤其投資高質素嘅基建項目。佢舉例說，單從北京暴雨成災帶嚟重大嘅經濟損失，已經反映出基建嘅不完善，「坦白說，北京嘅下水道已經係全國最好，但上次經濟損失亦好嚴重！」佢又話，中國正經歷城市化，客觀嚟講，基建需求係存在嘅！
絲絲以為佢嘅結論，係中國必須以投資救經濟，點知佢好快又轉view，話「世上冇嘢係永恒嘅，愛情都冇永恒，中國亦唔會永遠以投資刺激經濟！」
余詩韻