Market Insight：新地現價仍吸引

不過，股市一於少理，昨日恒指又升1%報20,269點，輾轉升番去三個月以來最高位。較合理解釋，基金手上唔夠貨，「茄薯」卻是不少，儘管七月下旬環球股票基金淨持現金比重由5.4%高位稍稍回落，但相對過往4%算高的歷史，芬佬入市彈藥仲係多多聲，部分落後板塊，好似鋼鐵、水泥及航運等基金無貨又大落後的股份，短線繼續死貓彈的機會唔細。

國統局公布七月份內地消費者物價指數（CPI），按年升1.8%，是一○年一月以來最低，提供寬鬆貨幣政策的彈性，不過，人仔拆息近日未見大起伏，一星期至一個月拆息都在3.2至3.31厘之間，人行兩度減息及透過逆回購提供流動性後，內地資金情況充裕，有分析員預期人行短期減存備金率（RRR）機會會比減息高，始終樓價四、五月見底後，近日有回升迹象，擔心減息會火上加油。

放大圖片

放大圖片

內地樓市最怕過熱

事實上，六、七月內地樓市統計數字顯示，全國百大城市住宅平均價格，七月回升0.33%至每平方米8,717元（人民幣‧下同），是繼六月止跌後，按月計第一次出現回升，君可見，年初至今跑贏大市的內房股，股價同樓價背道而馳，第二季唔少由高位回落，恒大地產（03333） 跌24.5%，雅居樂（03383）跌20.2%，富力（02777）跌13%，股市憂慮最後兩季樓價升勢持續，將促使中央壓抑樓價的無形之手，再度登場。

同內地比較，本地地產股未來的能見度，明顯清晰得多。幾個月前特首選舉，市場還憂慮本地房屋政策，會帶來翻天覆地的變化，造成地產股股價與不斷改寫九七年後新紀錄的樓價出現背馳，古勝曾經提到，若非業主睇錯市，就顯然是地產股錯價。

新政策助推高樓價

今日新政府組班超過一個月，市場也漸漸看到新班子房屋政策，無預期般推倒樓價的能耐，每年5,000白表「抽獎」買免補地價二手居屋，懂得簡單經濟學，都知無即市新供應推出下，樓價唔會因此掉頭，反而政策會衍生居屋樓價被搶高的副作用。

最近重返紅底股的新地（00016），早前兩次推介，一來古勝唔相信地產界龍頭因幾個管理層被調查影響營運，再者，被廉署調查消息曝光後，股價累積8.3%跌幅，相對同期升7.5%以及8.7%的長實（00001）及恒地（00012），已充分反映負面新聞。

若有番咁上下股齡，九七及○七年兩次樓市狂潮，地產股一般突破兩倍市帳率的紀錄，目前新地只係樓災期的0.8倍（其他地產股也好不了多少），投資者對未來樓價回落的風險，顯然作過悲的預期，現價的新地依然極之吸引。

昨日汽車股緊貼升市，長汽（02333）及吉汽（00175）均上升1.5%，而比亞迪（01211）及華晨（01114）分別升超過2%，廣汽（02238）升3.8%。魚缸有兩個利好消息，其一係話一汽擬斥43億人仔進軍新能源汽車板塊，多咗大車企搞新能源汽車，有助加快行業發展；另一個消息就話，早前傳出擬實施限車令嘅西安，喺穩增長嘅大前提之下，經已被叫停。

華晨前景較不明朗

其實，呢幾年汽車業喺補貼政策促使下，產銷量已大增，地方政府為咗達到節能環保目標，控制汽車數目實有其必要，拓展新能源汽車發展既有助解決節能環保問題，亦不致令汽車業冇飯開，但講到尾，除咗內地市場，車企必須加大拓展海外市場力度，才能解決產能過剩問題，而針對發展中城市，內地小型汽車喺性能同價格上均具競爭優勢。只係，喺咁多隻車股中，古勝對華晨依然未放心，皆因主營貴價車喺經濟不景氣下銷售前景不明朗，加上見到有長揸該股嘅基金逢高減持，難得呢幾日其股價由低位反彈成蚊有多，持貨者宜早定去留。

古勝