絲絲講場：蘇寧要做埋樂器龍頭？
內地家電銷售市場競爭愈嚟愈激烈，要成功突圍真係要諗吓計。尋日就有傳全國最大嘅家電零售商蘇寧電器正同樂器界嘅龍頭企業樂博進行緊收購談判，仲話如果成事，蘇寧就會成為家電同樂器嘅雙料冠軍。
傳斥幾十億購樂博
近年內地嘅經濟急速起飛，市場對樂器需求嘅潛力不容忽視，加上樂博亦都唔係等閒之輩。依家喺全國有百多間直接經營嘅連鎖琴行，同埋45間藝術培訓學校，係內地最大嘅樂器零售商。公司今年仲計劃將傳統門店改進為結合旗艦店、樂器體驗同專業樂器等集於一身嘅商業模式。
經過早前各大家電商一輪割喉式大減價後，大家都開始面對後遺症，着手去搵新嘅利潤增長點就成為咗業界嘅治療方案。而報道就話，蘇寧呢單收購只係涉資數十億元人民幣，但若果成事就可以令蘇寧進入呢個每年以30%速度急速增長，規模高達300億元人民幣嘅樂器行業啦！