好似絲絲咁樣嘅小股民，如果買咗一間公司嘅股票，之後佢盈利大跌，搞到股價插水，都只可以大嘆自己唔好彩，然後選擇一係坐貨望佢升番，一係快啲止蝕走人。不過，如果你係買賣億億聲嘅策略投資者就唔同講法嘞！
講緊嘅係富士康（02038）母公司，台灣嘅鴻海集團，呢間以生產蘋果公司產品出名嘅代工商，今年三月就公布，由富士康夥拍鴻海，將以每股550日圓，即係溢價11%，涉資約669.1億日圓（約65億港元），買入聲寶（Sharp）9.95%股權，而作為合作協議嘅一部分，聲寶將位於大阪嘅第十代LCD屏幕工廠Sharp Display Products（SDP）46.48%股權賣畀郭台銘個人，作價660億日圓（約64億港元）。聲寶最終喺呢次交易中估計可攞到約130億港元嘅現金，而鴻海所得到嘅，就係確保屏幕嘅供應，並可達成聯日抗韓嘅目的。有關收購仲等緊日本和台灣雙方嘅監管機構審批先算數。
但係聲寶最近公布次季業績，蝕咗成1,384億日圓，兼傳要裁員5,000人救亡，搞到尋日股價大插28%，收報192日圓，足足比鴻海入股價跌咗65%。而鴻海亦唔好過，台灣媒體報道，鴻海系公司市值，尋日喺一日內蒸發咗475億新台幣，一樣咁慘！
正當絲絲心諗，鴻海買聲寶隨時變成焗買貴嘢之際，鴻海尋晚就公布，董事長郭台銘已經同聲寶講掂數，唔使履行當日嘅協議，即係唔使再用當日嘅貴價入股，但鴻海就照樣維持買聲寶9.95%，詳細安排就遲啲再公布。
余詩韻