蘋果公司行政總裁庫克（Tim Cook）最近又有新搞作，仲吸引到好多網民關注，但佢今次唔係公布任何有關新iPhone 5或者Mini iPad嘅消息，而係佢喺社交網站The Fancy開咗個account，同啲蘋果迷分享一啲佢fancy嘅嘢。
可能好多人會同絲絲一樣，懷疑呢個account係假嘅，照計庫克日理萬機，應該無咩空閒時間玩呢啲社交網站，但係The Fancy同twitter一樣，需要名人驗證，而呢個account就已經驗證咗係庫克本人，各位蘋果迷可以放心follow呢個account啦！
身為一個畀咁多人追捧，一個咁神聖品牌嘅CEO，相信好多人都會好想知道，究竟佢會fancy啲咩呢？身為蘋果公司CEO就梗係會like番Apple Store啦，除咗咁，庫克仲好鍾意戶外活動，fancy咗Nike，Carvelo單車，Blaken手錶等等。
不過絲絲睇睇吓，就突然有個問號？庫克竟然fancy咗位於中國福建嘅太姥山， 太姥山融合山、海、川同人文景觀為一體，有「山海大觀」嘅美譽，仲畀國務院列入第二批國家級風景名勝區，難怪庫克都會為之神往，要like吓佢啦！