中國泳隊好耐都無喺國際賽事上奪獎，相隔28年，孫楊終於率先喺倫敦奧運勇奪一金一銀，聽到呢個消息真係好令人振奮，不過最高興嘅莫過於早前已經押寶喺孫楊身上嘅贊助商。邊個咁有眼光？就係伊利、361度（01361）同埋可口可樂喇！
呢三間上市公司好有先見之明，喺孫楊未奪獎之前已經搵佢代言，依家佢成績咁好，佢哋就梗係好興奮啦，有一位品牌商嘅負責人仲同絲絲講，話一早已經睇好佢，仲同孫楊準備咗一份長期合約。
其實有唔少人都認為孫楊嘅「錢」景會比劉翔同李娜好，因為孫楊喺今屆嘅奧運會戰績彪炳，氣勢明顯超越咗百一米欄王劉翔，而且孫楊只係得20歲，外形高大英俊又討好，相信會成為好多代言嘅搶手貨。
內地體育股搵代言人，又或者做贊助商，喺今屆倫奧好普遍，並且再唔局限贊助番自己中國人，外國好多奧運選手服裝都由內地體育股贊助添。咁大手筆，絲絲最有興趣就係，如果贊助嘅選手有獎牌攞，甚至奪金嘅話，啲贊助商嘅股價會唔會亦爆升？經過絲絲做嘅小統計，由上周五開幕至尋日止，贊助孫楊嘅361度累跌2.29%，而贊助中國體育代表團領獎服，又叫冠軍龍服嘅安踏體育（02020）則累升2.44%。至於其他好似股價沉咗一排嘅李寧（02331），期間更累升8.9%，而特步（01368）以及匹克（01968）亦見微升。不過，361度又唔使無心機，因為孫楊仲有1,500米自由泳一項未比賽，而呢項仲係佢嘅拿手項目，再奪金機會更被指係十拿九穩添！