Market Insight：江銅有待確認轉勢

港股昨日升23點報19,820點，成交稍有睇頭回升到530億元，翻查數字原來已經算兩個月以來最勁。

指數短短五日反彈900點，但古勝出席飯局中投行老友仲係對後市大潑冷水，話近幾日買盤大多來自對沖基金的冚空倉盤，真金白銀入貨的仲係少之又少，收市見到沽空佔大市成交比例，又的確落番唔少，已經連續四日低於一成，看來升市動力，是攔路淡友少咗，多過基金信心恢復開始買番貨。

放大圖片

放大圖片

歐央行行動受關注

睇相佬呃你十年八年，分析員話債息曲線顯示，九月中議息前聯儲局出QE3機會高達八成五，問題係今個月推抑或下個月推。

近幾星期美國幾個經濟數據，包括五月樓價中位數、七月個人開支增幅、採購經理指數及消費者信心均好過預期，伯南克會揀經濟緩慢復甦，華爾街歌舞昇平時之際出手？抑或預留彈藥九月後才用，以配合總統選前造勢呢？今日大家就會有答案，但即使落空，看來也不減股市對延後出招的預期（同時將超短期焦點放在今晚歐央行行動身上）。

昨日港股明顯見有偷步炒起的受惠於量寬股份，江西銅業（00358）成交大增，股價升近3%，完全無視全球最大銅消耗國中國的官方PMI數據轉弱。

今年四至五月，歐債危機愈演愈烈（歐盟佔全球銅消費21%），其時國際期銅價格，由每噸8,700美元高位，跌到六月低見7,200美元，之後兩個月時間停在7,200至7,800美元之間徘徊，無受歐盟PMI全線插水影響，上半年中國進口銅量，也未有在工業需求減少而回落，反而保持47%高增長。

渣打吸引力勝大象

有睇淡者認為，在中國庫存回升之下，即使歐美再出招未必令國際銅價大升，且看賭放水的會否表錯情，技術上，江銅需要突破18.2元的阻力，方可以確認升浪來臨。

環球經濟風高浪急，渣打集團（02888）中期成績能夠再創新高着實難得，半年業績純利28.06億美元升12%，中期息多派一成至0.2723美元，上半年股東資金回報率改善80基點去13.8%。大行評論所見，大部分都對管理層再次達到營運指引目標，表示滿意，估計全年業績會升9至10%左右，以1.2倍市帳率及一二年10倍市盈率，真係無乜可以挑剔，相比仍然被撥備不足尾巴拖着的大笨象滙控（00005），渣打看來相對吸引。

今年十一月可能係一個絕不平凡嘅月份，皆因有美國總統選舉，加埋內地十八大亦好可能喺呢個月召開，市場一直期望此前兩國政府會落重藥提振經濟造勢。究竟呢個憧憬會落空抑或實現，相信季內漸趨明朗。從呢個角度睇，八月份落場若然做啱邊，分分鐘可以搵到成年嘅利潤，所以古勝亦正在密切留意各項因素，做好心理準備末季可能出現大單邊市。

第四季勢出現拐點

博未來兩個月魚缸大翻身，煤炭、建材同基建鐵路股都係值博板塊。尋日見到水泥同煤炭股都有鑊氣，安徽海螺（00914）、中建材（03323）同西部水泥（02233）升幅介乎4至5%，煤炭股兗煤（01171）同中煤（01898）分別升6.2以及2.9%。繼續坐定呢兩個板塊等運到嘅話，可以從龍頭股入手，而當中的首選就會揀中國建材同埋中國神華（01088）。

古勝