峰迴路轉，恒指三扒兩撥就回試高位，月尾走勢一向飄忽，何況近期成交低迷，更加放大上落波幅。估計利好氣氛可以維持幾日，而醜股大翻身則會是此刻的主題。
上周五醜股已有異動，近期跌得太多，去到月尾，出現粉飾櫥窗亦是合理，加上今次反攻主題是炒歐美政策，大環境改善概念之下，很多醜股是會得益，市場情緒有幫助。
對於散戶而言，集中火力炒一兩隻已綽綽有餘，可是市場交投太低，出入風險仍在，要在這一趟渾水摸魚，自己至少要度接近十隻，分散注碼，否則稍後難以快速撤退，其他基金經理一樣有這個煩惱，所以醜股升勢可望較為全面，兼且會維持一陣子。
圍繞鐵路基建概念
只選一兩隻的話，概念應圍繞鐵路基建之類，理由是中國保增長板斧已有限，主力不外大興土木。當然不要再追幾隻當紅鐵路股，話明醜股大翻身，一定向剛開始反彈弱勢股埋手。不少鐵路基建相關股票根本尚在低位，被之前盈警所累，市況終於有改善，只要收復之前小部分失地，已經提供不俗水位。
順勢炒賣之餘，不要得意忘形，自己一向好淡並行為主打，跌市期間死守一批看似有毒的股票，同樣道理，升市也會保留個股淡倉，更加會打醒精神，隨時把握高位加注做淡心水長期弱股的機會，畢竟大市只是一個長期上落市。這樣又買又沽，炒埋一碟贏輸不會太多，但睇錯市的話，損傷會有限制。
這次便是股票好倉救番淡倉虧損，老實說是出乎筆者意料。假如貪心想去到盡十上十落，應該左一巴右一巴已輸死。上周五外圍股市是勁，但債市以外，其他市場走勢稍嫌有瑕疵，跟風還跟風，切忌頭腦過熱。
‧追買低位開始反彈的二三線
豐盛金融資產管理董事 黃國英（作者為註冊持牌人士）