「合則來，不合則去。」本來無乜稀奇，之不過，周三（廿五日）收市後，耀才證券（01428）公布，行政總裁吳劍華及梁衍燊齊齊辭職，就唔係咁常見。其實呢兩位前行政總裁喺耀才只係做咗五個月，無端端以私人理由而離開，唔通另有內幕？金占士睇落至知，耀才一間上市公司啫，原來用到三個行政總裁。
對此，耀才執行董事兼行政總裁陳啟峰就話：「離職係因為人各有志，當中唔包括意見分歧，或者有唔開心事件。佢哋都係希望搵其他業務發展路向，所以先決定離開！大家都係好朋友，早幾日先傾過電話。」佢又話，至於公司搵多幾個人做行政總裁，純粹係因為「人多好辦事」，從而獲得更多好意見。好似保險、地產行業，做阿頭嘅隨時半打起都有啦！
既然人事變動唔影響公司運作，難怪近日陳啟峰喺逆市之中「揼本」支持自己公司喇！「因為我對耀才嘅發展前景充滿信心，所以早幾日以0.57元買咗十五萬股。」
佢對公司出錢又出力，耀才有咁嘅CEO，其實一個都夠晒數啦！
金占士