絲絲講場：卓百德有樓揸手晚年無憂
摩根士丹利前董事總經理卓百德，雖然已屆退休之年，但仍然好努力寫報告研究經濟、股市以及樓市。最近佢老人家又再發功，喺報告入面預言各國減福利、減退休開支將會成為大趨勢，唔想老來無依，不如趁早買樓防老。佢仲自爆三十幾年前自己第一次買人壽保險，以及買樓嘅往事，最終買樓嘅回報大大跑贏買保險。
人壽保險難敵通脹
呢位現任Portwood Capital主席卓百德，回憶自己好多年前大學將近畢業時，買咗份人壽保險，張保單最吸引佢嘅地方，係供完後攞到嘅錢，足以買三至四間大學區附近嘅單位。當年未出道嘅佢幻想自己退休後有幾層樓揸手，都唔知幾爽！不過過咗冇幾年，張保單就大貶值，而元兇就係通脹，保單承諾所得嘅款項僅僅夠買一架落地十年嘅二手車。
一間自住一間投資
到咗一九七八年，當時佢大約29歲，喺倫敦一個唔錯嘅地點，買咗一間細小、極低層嘅單位，畀一成首期，九成按揭作為槓桿。卓百德話，入市時撞啱息低樓價又唔係好高，供得唔算辛苦。廿五年過去，按揭還晒，佢計過條數，若全期租出，租金較樓價加供樓利息仲要高25%。
佢嘅結論係，想退休有保障，應該趁後生買樓自住，同埋買多一間用嚟投資，咁退休嘅時候應該還晒樓按，就可以無債淨收租金度日。當然入市時機要配合得好，而且選擇投資物業應以地點作為首要考慮。
余絲韻