所謂新官上任三把火，如果知道自己公司快要換老闆時，你都咪話唔驚！絲絲最近收到風，里昂證券嘅中國區主席兼亞洲區副主席吳長根就喺公司變天之前，已經執好咗包袱走人。
中信証券啱啱喺上星期五（二十日）宣布，要用九點四二億美元買晒里昂亞太區市場嘅八成股份，加上信証本身已經有嘅兩成，好快里昂就會畀信証接管。里昂嘅首席執行官施立宏（Jonathan Slone）就話，喺全球股票市場蕭條嘅情況下，信証嘅收購可以推進佢哋中國嘅業務。
有知情人士偷偷地同絲絲講，原來吳長根早已經喺六月尾請辭，當時中信嘅收購都已經傾得七七八八，佢仲話，雖然吳長根辭咗職，但佢依家仲拎緊里昂人工㗎。吳長根喺○八年加入里昂，成為里昂喺中國嘅開荒牛，喺佢任內亦為里昂成功攞到喺上海提供經紀服務嘅批准。所以難怪里昂咁闊綽，因為呢位打工仔真係功勞不小，宜家吳長根辭職淡出里昂，都算係功成身退喇。