絲絲講場：數碼通4G 玩後發制人
標榜住「愛上不一樣」（love the difference）嘅數碼通（00315）早前一樣發生網絡事故，自然引起唔少用家不滿，當中包括絲絲嘅行家，令尋日數碼通個4G網絡記者會充滿火藥味。雖然面對群情洶湧，向來自信爆棚嘅數碼通總裁黎大鈞點會被嚇窒？佢仲叫大家遇到網絡問題，最緊要同佢哋反映，先可以解決問題喎！
面對本港同行陸續推出4G網絡，數碼通終於宣布下個月28日推出4G，到時現有嘅月費plan會同時享用咁話。雖然遲人哋九條街，黎總裁就解釋番，其實自己個3G唔輸畀其他網絡供應商嘅4G。大家唔好以為黎總裁空口講白話呀，佢哋真係做咗個網絡測試，喺全港70個地點進行超過1.8萬個速度測試，喺部分測試當中，數碼通3G網絡比起其他嘅4G網絡更為優勝。
「謙稱」好對手幾倍
講開又講，個記者會明明係介紹4G，點解絲絲聽來聽去都係3G嘅嘢呢？佢就話，公司會採取3G同4G兼容，而4G最大嘅優勢就係上載同下載大檔案，亦可以解決網絡擠塞，不過佢就突然「謙虛」話，唔會預期自己嘅4G做得好過人哋10倍，最多係好3、4倍喎!