聯想（00992）自從收購咗IBM個人電腦業務之後，生意可以話係蒸蒸日上，喺個人電腦市場已經穩佔「二哥」位置，市佔率更加直逼「一哥」惠普，而最新嘅數據顯示，呢個趨勢並冇停到喎！
根據研究機構IDC嘅最新數據，聯想今年第二季出貨量按年升咗25.2%，市佔率去到14.9%，距離惠普只有0.6個百分點；而聯想喺新公布嘅「財富500強」排行榜入面，亦都勁升80位去到第370名。
不過，早前另一研究機構Gartner嘅數字就顯示，聯想第二季出貨量只係升咗14.9%，但由於惠普跌咗12.1%，所以聯想市佔率都升到14.7%，同惠普差距由4.1個百分點縮到0.2個百分點。
雖然無論點睇，聯想出貨量同市佔率增長都仲係好快，不過，市場對佢嘅期望其實都幾高，好似上個月尾有傳佢哋今年出貨量增長降到得13%至15%，已經觸發聯想股價大跌一成。所以，如果Gartner嘅數據準確的話，聯想股東應該都唔係太happy！