內地知名連鎖餐飲企業俏江南創始人兼董事長張蘭，一般人可能對佢無乜認識，但係如果提起佢位公子汪小菲娶咗台灣女星大S（徐熙緩）嘅話，相信總會有啲印象。之不過，俏江南集團近排不利傳聞多籮籮，好似近期有關俏江南遭遇資金困境，欠薪甚至瀕臨倒閉嘅消息，喺市場上傳到好似真嘅一樣！
面對咁多流言蜚語，張蘭終於要現身，日前接受內地傳媒訪問，嚟個大解畫，首先張蘭就話，俏江南家陣面對嘅只係壓力愈來愈大，利潤愈來愈薄，但否認俏江南出現資金問題。
張蘭解釋自己無水緊，因為喺俏江南之前，自己用咗10年，喺呢個行業裏面積累咗資金。根據胡潤2011年《中國餐飲富豪榜》，張蘭排名第二位，身家31億元人民幣，家底豐厚，但張蘭笑言，若果吓吓都要用自己荷包，好似家陣撞上內地經濟下滑，搞不好就會有骨牌效應，現金流一斷，就非常可怕。
張蘭亦唔迴避，承認俏江南上市受阻呢個問題，並語重深長地說：「國內有這麼大的餐飲行業，應該出來一些龍頭企業，國家應該有政策扶持。但是大家都知道，兩年前我們就報會了，但是因為國家對這個行業有所限制。」
就絲絲所知，中證監對內地餐飲業申請上市一向好嚴格，鮮有企業能夠獲批上市，俏江南舊年3月已經傳要來港上市，集資大約8億美元，但搞搞吓無晒影，最近又再傳會係今年暑假後啟動來港上市，集資大縮水到1至2億美元，但最終上唔上到市，仲要睇吓中證監係咪放行。
張蘭亦大感無奈，仲話好似近期中央新36條密集出台，鼓勵民資進入能源、電訊等領域，但偏偏就無扶持餐飲業嘅政策。
余詩韻