期指觀瀾：淡倉食胡睇定再算
颱風過後市面一片狼藉，魚缸亦唔好得去邊，恒指昨日低開141點，午後曾一度倒升，但為時短暫，結果收報18,877點，跌25點，主板成交447億元。執筆時見到外圍市況終於回穩，《華爾街日報》話聯儲局出手的日子已愈來愈近。之不過，QE3並非大家想像般如此具威力，相信伯老唔到最差的時候都唔會出手。
昨日恒指現貨高低波幅215點，中資電訊股做好以及滙控（00005）反彈成回穩動力來源。七月期指收報18,850點，低水27點。筆者前日以三分之一資金小注追沽，話睇番六月初至七月初升浪的調整幅度0.618倍之18,636點，見昨日低位落到18,649點便止步，再加上投資者正在觀望本周末前人行可能會下調存備率，從滬綜指連日力守2,130點水平支持，便可見一斑，故先行平倉食胡。
技術上，恒指昨日一度跌穿頸線支持位18,850點，低見18,710點，但收市又重返其上，而現貨成交依然不足，故尚未能確定後市方向。考慮到到今日已是周四，七月期指結算在即，今日做好做淡都賭唔過，建議暫時忍忍手，開開心心睇倫敦奧運開幕禮，等下周初結算後再作部署。
John Mullen