Market Insight：家電股勿寄厚望

唯一可以畀古勝苦中作樂，係季度業績「慣常」優於預期的蘋果公司四至六月份季度業績撻Q，iPhone 4S銷售遜預期，從逆向去想，或者可以催促新iPhone 5面世，為年底份季度業績救亡救亡，屆時一眾果粉又有新玩具玩。

其實未睇研究報告，單係企響中環港鐵站等車時的目測顯示，「芒大」的三星Galaxy確實搶走蘋果唔少生意，而Google四至六月提及「Apple iPhone 4S」的網站2,200萬個，不到「Samsung Galaxy」3,800萬個的三分之二，在搶眼球的點數上蘋果輸晒。睇嚟真係有必要解決傳聞零部件供應樽頸問題，以縮短產品周期。

放大圖片

放大圖片

聯通仲有幾日炒吓

昨日，台灣相關股份在蘋果公司份業績後跌到一仆一碌，本地的瑞聲（02018）亦一度見跌9%洗倉一樣，巴克萊話業績後，相關股份調整反而提供機會，可以增持iPhone 5供應鏈中各類股票，iPhone 4S銷售放緩意味緊接的iPhone 5會相當熱爆，可留意台灣的鴻海、大立、臻鼎及香港的瑞聲。

港股失守頭肩頂頸線18,850點，但低成交下，一個唔該，大孖沙趁大部分人恐慌時去貪婪，恒指由早市跌最多192點，到收市跌幅收窄到25點，收報18,877點。自上星期公布六月份3G上客量回升到300萬後，聯通（00762）強勢畢呈，賓架選擇性地看上客數字，忘卻10蚊人仔2G及15蚊人仔3G的割喉式減價上車促銷伎倆（始終聯通是今年表現最差藍籌，唔少基金想趁一兩單好消息博反彈，幫補一吓），昨日咁啱得咁蹺，瑞銀、大摩、瑞信及德銀四間大行齊齊推介，股價逆市抽升5.6%報10.98元，有報告話聯通最快到八月先會再推新3G套餐，潛台詞係：仲有幾日炒。

收市後味千（00538）發盈警，預期六月底止半年業績會大幅倒退，自去年被爆豬骨湯無鈣之後，味千股價江河日下，由近18元跌到昨日5.13元，今日之後，可能一個即食麵都貴過一股。講到底，醜聞要花錢宣傳及需要時間復原之外，消費及經濟放緩下，部分估值過高消費股，正需要合理修正。

盈警浪接浪，首季業績大跌88%的國美電器（00493），預告半年業績見紅，股價一度見八年低位的0.62元，基金失望，源於競爭對手蘇寧，早前盈警估半年業績不過倒退兩至三成，國美對比下情況未許樂觀。分析員會議上，國美將問題歸咎於一、二線城市店舖銷售受經濟影響明顯放緩，電子商務業務虧損，以及白家電促銷使毛利率受壓所致，但就無提第二季同店銷售，會唔會同第一季34.4%跌幅相若。

網購打殘傳統門市

今日唔少內地朋友都鍾意到淘寶「濕平」，不禁令人想到，到底傳統家電零售商，是否應積極發展電子商貿及網上銷售？尤其家電屬於高度標準化的產品，同一品牌，同一產品，理論上北京或者深圳買的，是一模一樣，顧客群一旦習慣通過網上去貨比三家，傳統零售商功能變成陳列室，消費者看清同摸過，格價後好可能選擇營運成本低的網店購貨（正是淘寶近年冒起的最大優勢），今日國美拓展電子商貿縮減門市，感覺有點兩頭唔到岸。

近年一直巨額開店的投資隨時泡湯，亦不容易像低成本，沒有庫存的網店一樣能輕身上路，或許，短期同店銷售出現單位數反彈，可令股價收復部分失地，但這類營銷策略調整風險唔細，博反彈僅限於技術高超人士。

古勝