人所共知，中國愈來愈多有錢人，而且愈來愈多富二代，佢哋啲錢真係老竇剩落，多到使唔晒，而絲絲知道，依家私人銀行同富二代做生意，原來有好多潛規則，包括一齊打高爾夫球、品酒、坐遊艇去旅行，如果係女性富二代嘅話，連衣着打扮，潮流時尚都要識埋，真係多到數唔晒！
絲絲識得一個喺上市中資銀行私人部門做嘅朋友，佢入行三年，專門接待內地嘅富豪客戶，幫佢哋理財，但佢就呻最難同富二代打關係，以前嘅「富一代」白手興家，一分一毫都得來不容易，呢啲客嘅要求相當直接，主要都係討論生意擴展。
不過，依家嘅富二代，生活真係可以好奢華，對佢哋嚟講，錢當然係用嚟享受生活，歎美酒、揀珠寶真係等閒事，所以私人銀行部從業員除咗要幫客戶嘅資產增值，自己都要學埋品酒、打高爾夫球，同客戶交流交流，先可以留得住客人個心。
絲絲嘅朋友就話，面對住身家往往以億元計嘅尊貴客戶，必須要滿足客戶嘅全方位需求，無論係客戶個人嘅理財需要，抑或係客戶家庭、家族，以至企業嘅全面需要。佢哋不但要對所有金融產品都瞭如指掌，仲要知道企業上市需要買邊啲手錶、移民加拿大有邊幾種渠道等等！
講咗內地富二代咁耐，咁有啲乜嘢人呢？根據胡潤公布嘅「2012年中國少壯派富豪榜」，屬於富二代就有碧桂園（02007）嘅楊惠妍，身家360億元（人民幣‧下同）；海鑫鋼鐵嘅李兆會，身家120億元；新希望集團嘅劉暢，身家109億元。恒鼎實業嘅鮮揚，身家48億元；新都化工嘅朱睿，身家39億元等。其餘嘅仲有三一重工梁在中、世茂房地產（00813）許世壇等，身家都在10億元以上。
余詩韻