港股昨日半日市，主板成交292億元，相對近排全日都係得四五舊而言，交投算唔錯，但風雨過後，買賣盤積壓，不可以此作準，反而是外圍情況告急，警號是否解除，大家還是心裏無底。
七月份期指續低水，前日恒指淪為亞太區的最大輸家，不少散戶乘機入市撈底，博其跌過龍會現短暫後抽，恒指Call及牛證好倉錄得6,020萬元資金流入，淡倉同日流出了6,301萬元，結果如何？大戶繼續殺落，萬九守唔住，低位挫至18,854點，全日共有27隻牛證被強制收回，當中26隻是恒牛，估計被劏街貨約7億份，牛證防線被攻破，重貨區惟有再後退。
業績期臨近，以往是市場焦點，今年逾百間公司已發盈警，是否有得炒好難講，但盈警最勁之時，是否就是市況最壞的時刻，亦是無定案，都係嗰句跌市估底好危險，現時恒指技術走勢轉差，心急入市撈底，憧憬回報佳之時，要知道風險都好高。
電訊股昨日一枝獨秀，中國電信（00728）繼續靠iPhone食胡，上升1.9%，但筆者始終較喜愛中移（00941），貪其股息較高兼穩定，不妨小注博Call，睇88元，中移美林購（18810）今年十月二十二日到期，行使價88.89元，實際槓桿約14倍。
Handsome哥