呢期如果要數最多人關注嘅老總，雷士照明（02222）前老總吳長江當之無愧，皆因近期公司負面新聞多籮籮。如果各位粉絲唔善忘，吳生之前因畀人話賭錢輸身家，被迫斬倉同填孖展，將佢嘅大股東地位送咗畀另外一個基金股東，然後，由基金股東選出一名「有能賢士」頂住。
誰不知一波未平一波又起，原來新老總上場，不但唔能夠為大家加加油、打打氣，反而一班員工同分銷商竟然「行動一致」地罷工同唔做嘢，要求吳老總重新歸位同執掌江山。Prof. J見到，真係淚流滿面，皆因中國人的「情與義，值千金」確係無得頂。
但係再睇深一層，原來內地傳媒話有超過300個雷士員工加分銷商，一早靠吳生幫手買雷士股票，諗住有着數，又利益關係加上又係自己友，死硬派粉絲自然全力護航。從呢件事件，吳生嘅財政實力又畀我打咗「少少折」。
雷士面對住一股來自員工同分銷商嘅「兵變行動」，股東基金都變咗一個紙板公仔，完全都話唔到事。假設兩間基金公司忍痛離場，問題係吳生有乜水可以再接貨呢？吳總係時候發揮吓英雄本色，為雷士員工、股東同小股民幹出一番事業來，繼續追蹤，出發！
香港大學電子金融服務榮譽助理教授 徐燦傑