絲絲啱啱就收到新地（00016）本季刊，原來佢哋個新任集團副董事總經理雷霆都係阿仙奴嘅超級粉絲，平日賣樓就要成日着住套西裝啦，其實佢都買咗好多阿仙奴嘅波衫o架，不過冇機會着畀大家睇啫。
唔講唔知，阿仙奴喺八十年代處於最頂峰嘅狀態，更加贏咗十八年嚟第一個甲組聯賽冠軍添。身為阿仙奴粉絲，雷霆會趁住去英國探囝囝嘅機會，兩父子一齊去阿仙奴主場酋長球場「朝聖」，實地吸收吓阿仙奴啲「靈氣」。
雷霆仲話，睇波令到佢醒覺團隊精神就係公司成功嘅關鍵，好似球員之間嘅合作一樣，多得公司各部門嘅同事分工合作、全力配合，成個物業銷售嘅策劃至可以成功；佢亦覺得銷售成績之所以咁理想，全因公司嘅同事都抱住一齊「做好件事」嘅心態。