喺上周馬仕達國際（08146）嘅上市儀式上，絲絲見到班管理層中一位身材高挑嘅靚女黃淑芳（Linda），令人眼前一亮，年紀未夠30歲，就已經擔起公司財務總監兼秘書嘅重責！以往財金圈雖然有唔少年輕靚女，但都以銷售產品居多，行政管理職業女性好少咁後生，Linda算係少數派。
識得欣賞Linda靚女嘅，又何止絲絲一個，早幾年佢曾經受到廣告商青睞，做過兼職模特兒，幫某大品牌嘅瘦身咖啡拍過一輯平面廣告，喺各大地鐵站內展出，唔怪得絲絲第一眼就覺得Linda有啲熟口熟面啦。
朋友同絲絲講番，原來Linda未加入馬仕達之前，曾經喺某大會計師行任職過幾年時間，處理過唔少公司上市嘅case，所以話要成功，背後付出嘅努力同汗水真係唔少得。