每次出場收30萬人仔
內地影視名人收錢參加樓盤活動就好平常，原來胡潤喺發展商中間都好吃香，有內地媒體專門研究過胡潤多年來喺內地行走江湖嘅獨門秘笈，發現佢由舊年開始，就頻頻出席內地樓盤開盤或者促銷活動，或者參加由房地產商舉辦嘅經濟論壇，每到一個地方通常都會對當地富豪嘅數量同特點發表見解，或者發布一個當地富豪榜，雖然次次演講內容大同小異，但曝光率相當之高。
市場傳聞話，胡潤每次出席地產商活動，都可以收到大概20至30萬人仔嘅「出場費」，計下佢過去呢三、四年最少出席過廿個樓盤活動，淨袋成500萬人仔，可以話係非常之和味。