內地三大電訊商競爭真係非常激烈，雖然佢哋之前公布嘅6月上客情況都唔錯，但係佢哋之間嘅減價戰似乎冇停止嘅迹象喎！兩間有賣iPhone嘅電訊商就更加係鬥個你死我活。
中電信（00728）旗下北京電信尋日開始，喺佢個網上營業廳上面，以優惠價4,280蚊人仔賣16GB黑色iPhone 4S，比原價減咗成1,500蚊人仔，即係大約打咗個七五折！不過就要簽24個月約同預繳通話費，每人限訂三部，同埋唔可以同其他優惠同時使用。
其實之前中電信已經試過向企業客戶推出iPhone 4S買十送一嘅優惠，引起極大迴響，之後引嚟聯通（00762）反擊，上個月中廣東聯通就將iPhone 4S打個八折，「劈價」1,200蚊人仔，減到4,680蚊人仔，估唔到中電信今次仲狼過佢，睇嚟佢哋仲有排鬥，不過據聞佢哋啲來貨價係冇得減，即係每部硬食千幾蚊人仔差價，睇怕業績都好難話唔傷。