孖妹S檔案：碧斯十個不滅Big Ideas

黃：豐盛金融資產管理董事黃國英

莊：致富證券資產管理部聯席董事莊志豪

曾：元朗股神曾錦安

金句一：請記住市場總有可能出現一個「災難性」結果。

曾：「佢講嘅係危機意識，我認同呀！世事循環，萬變不離其宗，所以股市亦有循環，有升有跌，有其正確軌道，但千萬不能偏離，因為一偏則容易滅亡，後果或會不堪設想。」

金句二：長遠而言，你要成為資產的擁有者，而非貸款人。

黃：「當然啦！贏錢唔係最叻，最重要係keep money。好似前嗰輪，我喺市場上連贏九日錢，點知第十日就輸番接近一半。唉！無嘅，惟有不斷反省錯誤囉，以後買賣贏咗錢要識得逐次減少注碼。」

金句三：讀書、讀書、讀書……

莊：「非常認同！投資市場並非股價上上落落咁簡單，當中包括埋人嘅心理質素、政治及歷史因素等，而不斷咁讀金融及經濟以外嘅書籍，可幫助吸收不同方面嘅知識，例如讀心理學、社會學、歷史書，當中有不少理論與投資心理及行為都有共通點，所以多讀書無疑可以擴闊投資視野。」

金句四：知己知彼，要知道你的弱點，並確保你所知道的資訊全是事實。

曾：「散戶嘅弱點咪就係大戶嘅點心！既然知道自己處於弱勢，咁當然要知進退喇！而且，散戶永遠唔會接收到市場嘅第一手資訊，先知先覺嘅永遠都係大戶（大鱷），等到佢哋再放料出來，資訊都隔咗好幾層了，事實都變質喇，惟有自己小心做分析囉。」

金句五：個人投資日記是朝向正確投資的一步。

曾：「呢個係好習慣，我都有寫開，除記低買賣股票嘅原因、買賣價位等資料外，我仲會寫下自己對市場現象嘅睇法，提醒自己不要犯錯。而且，清楚做好投資買賣紀錄，亦可方便資金調配，不時重整投資組合。有時我睇番以前寫低嘅投資日記，發現自己依然會把錯誤重蹈覆轍。寫低都會再錯，更何況唔寫低呢？」

金句六：不要因為較低波動性而去犧牲較高的回報。

莊：「我對呢個看法抱中性態度，投資市場充斥各種類型嘅投資者，每人嘅心理質素、投資目標、可承受風險程度都不一樣，故投資方法可以五花八門。股市存在供求關係，有人沽貨自然有人接貨，可見追求高或低波幅並無對錯之分，最緊要係散戶賺到錢啫，咁有啲人真係做投機，低波幅都要去炒o架嘛！」

金句七：能夠在波動市場上免除心理影響尤其重要。

黃：「同意呀，不過呢個真係好難做到，因為人類係有偏見嘅動物，當自己有盤在手嘅時候，就算明明知道唔應該咁做，但都會做咗，好自然地咁去犯錯。而且，人係會感到疲倦的，呢個精神狀況亦會影響投資買賣嘅判斷能力。」

金句八：要警惕「人性傾向」是投資場上的最後一戰。

曾：「佢講得啱呀！投資就係打一場心理戰。我成日同啲散戶朋友講，無論你買咩投資工具都好，總之喺入市買貨之前，如果你能夠遵守兩個規則，咁就放膽去買喇！第一，投資嗰筆錢用咗後，唔會影響之後嘅日常生活開支，唔會搞到無飯開；第二，買貨之後，要晚晚瞓得着，唔會心掛掛，以免搞出股票抑鬱病。」

金句九：沒有任何量化分析或資產分配方程式是永遠成功的。

黃：「啱呀！當大家共用一種投資方法嘅時候，結果通常都係唔成功。因為市場唔可以做到無限大，當市場深度唔夠時，假設所有人都用量化模式去做大，咁就會好危險。同埋你啲交易對手唔係傻o架，當佢哋感覺到唔妥時，隨時會反攻。」

金句十：宏觀投資很簡單，但絕非易事，你必須擁有良好的資訊及快捷反應。

莊：「我有少少唔認同！一個經濟循環講緊八至十年時間，衰退上嚟，股市隨時差足三至四年，可見宏觀投資需要耐性，你要肯為個大市去捱時間，等待曙光來臨。我覺得快捷反應都係適合炒短線、投機嘅散戶多啲。宏觀投資最重要就係成功捕捉大市嘅轉捩點，所以不斷跟進基本因素變化會係最重要資訊。」

巴頓‧碧斯（Barton Biggs）簡歷

出生日期：1932年11月26日（享年79歲）

家庭狀況：離婚，育有三個孩子

學歷：美國耶魯大學主修英語及創作，拜詩人及小說家Robert Penn Warren為師

工作經驗：早於1965年創立Fairfield Partners，為美國第一代的對沖基金經理，其後加入摩根士丹利並創立投資管理分部，同為該行前首席環球策略師，以投資新興市場為主；於2003年以71歲之齡退休，其後創立對沖基金Traxis Partners，並不時對投資市場發表言論

榮譽及獎項：過去三十年，多次被《機構投資者》雜誌評為年度最佳美國策略師、最佳全球策略師（1996至2003年）

個人著作：《Hedgehogging》（2006）、《Wealth, War and Wisdom》（2008）、《A Hedge-Fund Tale》（2011）

高妹、彩兒

若有料報畀高妹同彩兒或有嘢問，可電郵money.biz@opg.com.hk