連港交所（00388）都要收購LME（倫敦金屬交易所）幫補吓，就知港股成交幾咁薄弱喇！孖妹真係擔心本港證券行嘅發展前景！回顧過去十五年，我哋經歷九七亞洲金融風暴、科網股爆破、沙士、○八年金融海嘯，以至今日仍未解決嘅歐美債務危機。究竟未來十五年，本港「魚缸」如何可逆「難」以上？
新鴻基金融喺二○○○年成立「鴻財網」，為首批提供「一站式」網上股票買賣服務嘅證券行，喺○二年成立財富管理業務及另類投資業務，正式踏上轉型之路。新鴻基金融財富管理及經紀業務營運總監戴耀權稱，隨住股票交易電子化，散戶可經網上自行做買賣，故公司喺十年前便向財富管理方向進發，為無暇打理財富嘅客人提供金融服務。
雖然新鴻基金融將旗下證券分行執咗，但佢亦喺銅鑼灣、旺角、荃灣開咗三間財富管理中心，為本地客戶提供服務。戴耀權說，為咗繼續向「本地投行」目標進發，去年更推出旗艦品牌「新鴻基尊尚資本管理」，又同陸東資產管理締結策略聯盟，希望能開拓高資產值嘅客戶群，未來亦會緊盯內地嘅投資機會，務求再拓展中國市場。
戴耀權
分行數目：3間
員工數目：約1,000人
股票佣金：網上證券交易佣金收費低至0.088%
七二年創辦嘅時富金融（00510），其提供嘅金融服務可謂包羅萬有，九八年成立首個網上電子交易平台，近年更發展全球首創嘅「3D智能經紀」，以實時及人性化系統去提升網絡互動溝通。
身為本地老牌證券行，時富金融執行董事鄭文彬坦言：「十五年前嘅金融環境與今天大有不同，以前邊有咁多中資股來港上市，可見現時嘅金融機構亦非只服務本地市場，隨住中國資本帳打開，人民幣國際化，只要我哋喺基礎建設上與時並進，我對未來嘅營商環境十分樂觀。」他說今時今日嘅散戶類型愈趨細化，對金融產品及服務要求亦提高咗，所以證券行嘅質素亦要更加專業及細緻。
鄭文彬
分行數目：3間
員工數目：約400人
股票佣金：網上交易佣金收費低至0.25%
信誠證券喺一九八五年成立，現為B組經紀行，目前淨資產逾港幣20億元，管理客戶資產逾數十億元。所有孖展戶口的融資均以本集團現金支持，毋須向銀行借貸。九八年之後，信誠更為公司設立網站，以配合日漸普及嘅網上交易服務。
作為本地證券行，近年經營環境愈趨困難，究竟點樣先可以留住散戶嘅心？信誠證券聯席董事張智威就指：「服務本地散戶係信誠永遠不變嘅重心，但我哋亦會不斷開拓各式各樣嘅金融產品，以優質服務留住固有客戶外，並吸納其他地方嘅潛在客戶。」
張智威
分行數目：6間
員工數目：約250人
股票佣金：網上交易佣金收費低至0.125%
致富證券喺○一年推出網上證券交易服務，○二年推出行內獨家嘅「獨立會計師每天覆核制度」，務求提升散戶對本地證券行嘅信心。回首過去十五年，致富喺○二年於九龍城開設旗下首間證券分行，經過多年來嘅擴充，至今分行數目已達20間，早年更投入數百萬元為各區分行進行裝修大翻新，等散戶炒股時坐得更舒服。
談到未來發展策略，致富證券部經理郭家安表示：「最近我哋推出月供股票零佣金服務，未來亦會繼續維持相宜佣金收費，提升硬件質素及提供窩心服務。」
郭家安
分行數目：20間
員工數目：逾200人
股票佣金：網上證券交易佣金收費低至0.0675%
耀才證券（01428）喺九五年創立，一○年喺港交所主板上市，現時業務涵蓋港股、美股、中國B股、新加坡股及台股買賣、環球期貨、新股認購及孖展融資等。
耀才證券行政總裁陳啟峰表示，未來會開展更多金融產品與服務，希望為本地散戶提供「一條龍」服務。
自○三年政府取消「最低佣金制度」，耀才便致力提供「茶餐廳收費，六星級服務」嘅證券及期貨交易服務。陳啟峰補充：「港股小型直通車已經開咗，只要環球市況轉好，港股前景一定受惠，本地證券行實有得做。雖然我哋佣金好平，但服務質素一點也不差，客戶絕對唔使擔心電腦死機嘅問題。」
陳啟峰
分行數目：14間
員工數目：逾200人
股票佣金：網上交易佣金收費低至0.0668%
於九七年初來港開業，今年係凱基證券（香港）扎根本地十五周年。該行營運總監鄺民彬表示，公司喺九九年收購海裕證券及海裕期貨後，發展一日千里，過去與本港共同經歷不少金融風浪，可謂試過「起」也試過「落」。
他解釋，雖然凱基（香港）為台資背景，但一直以適合港人投資需要去做生意，而○九年合併香港台証證券及台新資本後，令集團實力更雄厚，經資源整合下，大幅提升競爭力，令人手、業務及客戶基礎等得以加強。早前凱基集團被台灣開發金控收購，令實力再提升，未來中國經濟只會愈加開放，故凱基（香港）可作為跳板角色，有助將來大中華區嘅布局和發展。
鄺民彬
分行數目： 7間
員工數目： 逾700人
股票佣金： 網上交易佣金收費低至0.15%
群益證券（香港），九三年於本港設立子公司，在總公司大力支持下拓展各項證券金融業務，不過該行就少做散戶生意，反而多做上市保薦、有價證券發行、承銷、企業合併、收購、分拆等資本市場業務。該行研究部董事曾永堅表示，以往公司主力集中服務機構性客戶，本地散戶主要由經紀去負責，此經營模式亦避免捲入近年本地證券行嘅「減價戰」。
他續指，中國金融市場逐漸開放，預計兩岸嘅經濟合作愈趨增多，台灣投資者知道中國市場極具投資前景，只要時機配合，群益（香港）將會引入台灣市場嘅資金進入港股。至於本地證券業務，就繼續由經紀去負責開拓新客。
曾永堅
分行數目：1間（中環總行）
員工數目：約60人
股票佣金：視乎個別經紀而定
高妹、彩兒
若有料報畀高妹同彩兒或有嘢問，可電郵money.biz@opg.com.hk