牛熊輪流炒：港交所博短線反彈 吼18478
上周內地公布一系列數據，最惹人關注的是第二季經濟增長，只有7.6%，市場續為下調存款準備金率作倒數，恒指輕微高開後窄幅牛皮，埋單升67點，周末前升市，主板成交縮到380億元。全周恒指累跌708點，國指就挫443點。
大市低迷，股民無心戀棧，離場觀望有之，大減注碼的有之，個別股份成交無多，個股輪成交當然跟隨正股大縮，就算引伸波幅縮到好似好便宜，輪價望落唔貴，但氣氛使然，後市睇唔通，股民又喜買Call輪，唔鍾意買Put輪，市場上Put輪選擇唔多，形勢如此，成交跌是理所當然。
央行放水刺激有限
市場炒放水，歐美股市周末前做好，道指勁升超過二百點，上周五個交易日恒指牛證及call輪好倉持續流入資金，達1.7億元，牛證街貨較熊證街貨多近10億份，數量之多反映投資者傾向睇好短線再彈，博牛證者記得睇位套現。今年以來任何放水舉動，都只帶來短暫亢奮，經濟實質未脫離衰退的陰霾。
港交所（00388）上周勢弱難撐，再試全年低位，有人認為百元關未必守得住。收購LME引來市場諸多評論，有指收購價佔其市值有限，又有中央支持，股價都有所反映，再睇淡的水位唔多。
筆者對上述觀點略有認同，港交所股價跌至現水平，100元關應有力一守，可以考慮港交瑞信購（18478），今年九月二十八日到期，行使價110元，引伸波幅30%，實際槓桿15倍。不過，大市成交額低迷，新股數目銳減，都影響港交所中線收入，短線做Call後，再考慮中線反手轉Put。
Handsome哥