近期壞消息一個接一個，銀行作為萬業之母，首當其衝真係預咗，見Big 4喺溫州畀人拖數，雖然份盈利只係冰山一角，或者用風險管理已經一早計算在內，但資金緊，中國放水業務似乎大有作為，企業要喺寒冬中穩守，真係絕不容易，成本對沖自然係不容有失，起碼叫做為公司做番少少嘢。但對沖不當，引發投機性行動，咁樣無疑係「放火燒死自己」認真大鑊。要講嘅主角，梗係對賭鑄成大錯的好孩子（01086）。
媒體講好孩子對賭，對事實了解唔透徹，Prof. J教大家，對沖成本一般來講係企業風險管理做法，大方向係冇錯，但往往好多時候企業主管會將對沖同投機混為一談，以對沖為名來為投機埋下伏線。大家都知好孩子七成以美金結算，做對沖係啱，但大家唔好忘記上年美國伯仔OT一出，將人仔嘅神話美夢打碎咗，通常管理層對沖，確係有自己「執迷不悔」嘅立場，最終咪搞到自己一身蟻囉。
好孩子無主動同媒體解釋事件，條款係點令大家得個估字。正如我偶像柯南話頭真相只有一個，原本舊年收益來自衍生工具，以呢個為線索，似乎加強咗好孩子變咗野孩子，小股民又要陪你再坐一會！睇基本因素，零售股地雷──現金流「窄窄哋」，存貨、應收帳全部中晒。回歸基本，睇吓好孩子會唔會乖乖哋為股東做個好孩子啦！
香港大學電子金融服務榮譽助理教授 徐燦傑