香港寸金尺土，一半無殼族住政府房屋，四百萬元上車盤畀人叫窮人恩物，堅尼系數顯示香港貧富懸殊全亞洲最嚴重，仲未講空氣、環境染污等問題，但諗都諗唔到，新一年《經濟學人》智庫比賽，香港被選為「全球宜居城市指數」首位，最弔詭係長居三甲，港人移民勝地溫哥華，在《經濟學人》今年以七個新準則下，廿名不入，莫非邢理強真係身在福中不知福，在仙境而不自知？
話說回頭，香港搵食艱難，打工仔解決到衣食住行問題，退休後點算？港人平均壽命82歲排全球第二，畀你捱到65歲光榮退休，無全民退休保障下，個個最後十幾廿年要食自己，咁大壓力仲可以延年益壽，難怪個個話香港福地也。
最近有金融機構調查話，四成受訪者考慮推遲退休，原因係預期退休所需金額，同現實儲蓄差距，由一○年100萬元增加到140萬元，可見享受合理退休生活，同現實是兩碼事。調查仲話，受訪者預期退休後所需花費積蓄，由一○年416萬，升至現時的442萬。
假設82歲命65歲退休，442萬攤分十七年用，每月有兩萬二元，唔使諗住屋問題，都算有尊嚴地生活，一旦包埋租樓、供樓兼交埋差管就唔同講法，尤其是，由統計處資料睇到，多得最低工資抽高近8.5%，一一年打工仔收入中位數先得12,800元，青春有限，點樣可以在當打之年儲到345個月月薪，或者28.7年唔使唔食，邢理強都想問一問呢班樂觀的受訪者。
強積金本來是退休儲蓄的重要一步，惟託管基金質素良莠不齊，政府對一班年年收管理費，去幫大家蝕錢的基金公司，不聞不問，最近睇番供咗咁多年，唔單止無回報，甚至連本都收唔番要蝕入肉，實在難明特區政府，點解唔諗諗畀強積金供款放入iBond或者盈富基金（02800），硬要益班基金佬，逢年頭收到強積金份年結報告，睇見真係命都短幾年。講到口水乾，只想帶出一個問題，港人莫財難言退休，港府是否可以在強積金方面諗吓計呢？
INVEST 邢理強