建造業人手短缺呢個問題一直解決唔到，肯入行嘅始終係少數，但工程數量就愈嚟愈多，為咗吸引多啲人入行，周不時都會聽到邊一類工人嘅人工又加咗幾多咁，尋日絲絲就同建築商俊和（00711）主席彭一庭同副主席彭一邦兩兄弟傾開，佢哋講到個情況都幾誇張吓。
佢哋話，過去一年建造業人工平均升咗大約兩至三成，個別工種仲唔止添，呢個升幅肯定係各行業中，至top嗰頭幾位。不過大家都會覺得，建造業日曬雨淋，又要擔擔抬抬，又容易有工傷意外，人工再高都咪搞，好似絲絲呢啲弱質女流就更加唔使諗，點知兩位彭生就話，絲絲呢種諗法大錯特錯喎！
聽佢哋講，唔係所有地盤工都係咁嘅性質，有一種叫「安全主任」嘅工種，依家非常渴市，有幾年經驗嘅月薪可以去到四、五萬！而且讀一個為時年幾嘅文憑課程就做得，同埋唔使搬重嘢，女仔都可以做，搞到絲絲都心郁郁。
仲有另一種，就係控制機器嘅「機手」，有冷氣房坐，月薪都有兩三萬，相信呢啲筍工都會愈嚟愈多人爭，有意嘅朋友就快喇！
余詩韻