美國聯儲局會議紀錄一出，大家不得不認短期QE3無望，昨日港股輕微低開後愈跌愈多，一度穿埋萬九關。市場對今日中國第二季GDP數據，由觀望到不樂觀，連第三季都唔睇好。恒指收市跌394點，主板成交增至472億元。
昨日提及明顯有資金流入恒指認購證及牛證好倉，牛證總街貨仲衝破30億份，熊證只有十八、九億份，數量懸殊，牛證重貨區又極之貼價，加上外圍不利消息手到拿來，殺牛誘因如此充足，唔殺都對唔住自己，結果昨日40隻牛證被收回，當中32隻是恒指牛證，估計被劏街貨超過10億份，防守線退至萬九點之下。
大市即日波幅擴大至358點，恒指波幅指數浮上20樓上，報20.65，焦點既是炒市不炒股，窩輪成交轉弱，按日跌近一成至45.44億元，恒指輪佔比仲急增至四成以上，個股輪人氣輸晒。
A股昨日喘穩，表現跑贏港股多個身位，市場實際是為減存款準備金率作倒數，但減了又如何，經濟放緩是不爭事實，放鬆銀根只是一個抗逆境的工具。
昨日港股沽空56.41億元，佔比上升至接近12%，安碩A50中國（02823）是昨日沽空最多股票，股價跌1.6%，相關沽空6.5億元，佔股份成交41.29%，情況異常。中央送大禮之一是中港兩地互掛ETF，A50是一種合成ETF，以往無太多競爭對手，未來就隨供應增加而吸引力起變化，除非A股來個大逆轉，否則短線要升有難度。
港股昨日未有跟隨A股反彈，口痕友又來報料，話唔計市場是否提早反映今日內地數據不妙的因素，但向下睇萬八不是無可能，萬九樓上博熊有得諗，有興趣可吼恒指瑞信熊（62899），今年十一月二十九日到期，收回點數19,650點，槓桿比率20.9倍。
Handsome哥