Market Insight：資金避險 債券渴市

查實近期避險資金不斷回流美債，十年美債孳息跌到唔夠1.5厘半世紀新低，仲可以推低幾多水位？唔使畫公仔畫出腸！古勝維持短期美國推QE3可能性唔大的預測，不妨由客觀條件去睇，美國經濟對比歐洲唔算太差，假假地過去兩個月都有10.5萬及8.4萬份新職位，只可以話復甦力度唔夠。

由日本經驗，量寬的威力明顯有邊際遞減情況，美國QE1、QE2威力亦一次弱過一次，伯南克手上王牌唔多，慳住用乃人之常情。展望十一月美國總統大選，時間上，第三季尾、第四季初要提升經濟活力的誘因較大，QE3，恐怕未係時候。

放大圖片

放大圖片

藍籌股昨日跌勢都幾全面，得中石化（00386）獨善其身，恒指跌394點報19,025點，升市成交縮，跌市成交增加，唔係好兆頭。

內銀捧場客傷得甘

走勢上，恒指仲未失守六月反彈市的支持位18,850點，國指情況較令人擔憂，跌206點報9,166點，經已重返去年十月中水平，建行（00939）的30億人仔爛帳，對內銀股捧場客打擊確係唔講得笑，三月初至今國指跌咗逾2,400點，裏面1,030點由「中農工建交」五隻內銀股貢獻，內銀股到底仲要跌幾多，變成氣氛主導，同估值愈來愈無關係，五月初接淡馬錫兩批內銀股的大孖沙，相信依家都牙痛咁聲。

基金揸重現金難免畀大客詐型，資金四圍搵地方泊，最終受惠，乃較唔受外圍經濟影響兼高息的抗熊奇葩，年初至今，新意網（08008）股價升59%、置富產業（00778）上升28%、和電香港（00215）都升25%。

近期有一現象，連公司債都見資金熱捧，好似新奧能源（02688）二一年嘅債券年初至今累積升16.6%（未計收息），比正股今年11.2%升幅更勁；至於內房債，碧桂園（02007）一八年債升20%，雅居樂（03383）一七年債券升22%，但凡6厘以上，10厘以下嘅非投資級別公司債，變晒基金及擁有私人銀行戶口的「大種散戶」新寵。

聯通要轉勢唔容易

弱市招股，貨源盡入強者手的H+B新股伊泰煤炭（03948），首日掛牌險守招股價，由早段低位41.1元，彈番到43元招股價收市，全日成交得1.17億元，若非煤價未見底，這貨源乾到極的伊泰真係要望多兩眼。周大福（01929）四至六月，亦即是財政年度第一季度營運數據，香港及澳門同店銷售額同比跌1%，來自內地大款的高消費神話不再，大行報告話七至九月情況難以樂觀，一眾珠寶股尋底趨勢相信未完。

中國聯通（00762）又出招搶客，3G減完輪番2G，宣布廣東推月費人民幣5元1GB、10元5GB流量的2G數據「隨意玩」。古勝早前壞手機，借來2.5G手機，用一日已經投降，好奇怎可能以龜速2G網用到5GB用量？

消息拖累，聯通昨股價曾低見9.5元，同一年新低9.47元一步之距，iPhone無獨家銷售及3G上客放緩，經已令聯通溢價全面褪色，但分析員樂觀假設今年賺70億元，市盈率仍然係天價的27倍，估計沽聯通換中移（00941）的趨勢，仲可以持續落去。

振興經濟靠新板斧

今日係黑色星期五，內地次季GDP破八可能應驗不祥之兆，魚缸係咪否極泰來，就要睇中央有咩板斧可以刺激內需，振興經濟。老實講，若然又係加快「十二五」規劃項目審批之類別舊調，睇怕難以提振人心，必須要有新舉措示人，始可扭轉困局。板塊方面，昨日A股煤炭股做好，港股中三隻大型煤炭股神華（01088）、兗煤（01171）及中煤（01898）表現亦強於大市，係咪危中有機，好快有答案！

古勝