依家聯交所同證監對申請上市公司嘅要求愈嚟愈嚴，金占士個賓卡朋友同我呻，話啱啱有個申請畀上市委員會否決咗，原因係有個主要股東幾年前犯過事，啲委員就質疑佢嘅誠信，仲講到明個主要股東一日喺度，就一日都唔會批，不過呢位朋友自己都抵死嘅。
呢間係內地嘅環保公司，舊年盈利有近3億元人民幣，主席兼創辦人揸近三成股權，五成幾股東係私募基金，條件咁好諗唔到點解被拒，原來係剩餘呢唔夠兩成股權，持有人係主席嘅拍檔兼朋友，係某A股嘅大股東，但佢幾年前畀內地交易所譴責過，朋友間行做保薦要作出披露。
委員會指佢誠信有問題，即使佢無參與公司運作都唔會批，一定要佢賣晒啲股份，但霎時間邊度搵人買，所以好頭痕。
金占士做過投行，即刻話佢做乜咁蠢咁老實，應知道咁樣有機會唔批，其實只要上市前先叫幾位股東合組控股公司，只要唔係直接揸，佢又唔係最大股東，呢位「問題股東」個名就可以隱沒，因為好多上市公司都有同樣情況。
點知個朋友話佢都諗到，但因為單刁由唔同嘅同事負責，披露股東背景一項佢未睇清楚，點知已經入咗聯交所，追唔番轉頭，份申請表於是去咗斷頭台。
金占士