自從中國經濟崛起之後，全球資本市場都可以見到中資機構嘅身影，不過佢哋今次唔再買高級品牌奢侈品，亦唔係買高科技電子產品，而係出資17.9億元（美元‧下同）買起成間製造私人飛機嘅美國航天公司，究竟呢間公司有咩特別之處吸引到中國人呢？
呢間製造飛機嘅公司叫Hawker Beechcraft（豪客比奇公司），因為雷曼事件令到全球私人飛機生意一落千丈，由2007年出售4,272架民航客機，到上年賣出1,865架，公司喺資不抵債嘅情況下，惟有申請破產保護令。公司股東高盛同加拿大私募基金Onex，今回真係出晒血，2007年以33億買入，依家以17.9億出售。買家北京卓越航空，有45日獨家商討時間，如果錯過咗呢主好人家，豪客比奇就要去美國破產法院畀人煎皮拆骨喇！
卓越航空有成40%係由北京市政府持有，今次嘅買賣唔包括豪客比奇國防業務部分，即係負責製造美國空軍練習用T-6螺旋槳式飛機嘅部分，始終呢啲係屬於國家機密，所以都唔會向外出售。但係今次呢單刁都可以話係雙贏，Hawker Beechcraft可以進軍中國市場，預計可以喺未來10-15年有超過10%嘅增長，而中國可以知多啲其他國家嘅技術。