雖然港交所（00388）交易大堂嘅「紅衫仔」（即出市代表）近年已「買少見少」，但交易大堂始終陪伴咗香港人咁耐，又係本港金融市場嘅象徵，所以大家都特別關心交易大堂嘅一舉一動。
尋日港交所就通知經紀，交易大堂同交易所展覽廳將會喺九月展開大型裝修工程，部分交易大堂嘅證券交易枱將會被拆卸或者改動，以騰出空間用嚟作新聞直播室同舉行上市儀式。
吓！咁交易大堂嘅「紅衫仔」數目會唔會逐步減少㗎？事實上，已有證券界行家同絲絲講，近年港股成交差，佢哋生意唔好，交易大堂又要加租，為咗「慳得就慳」，寧願唔派出市代表去交易大堂。
咁睇番港交所最新嘅數字，今年六月份的確得番八十幾、九十個出市員。同當年嘅幾百個比較，真係「今時唔同往日」！
不過，港交所就大派定心丸，承諾會盡力減少裝修工程對出市代表嘅影響。港交所將會個別通知已租用證券交易枱嘅經紀，佢哋會唔會受工程影響，同埋如需搬遷嘅詳情。受影響嘅出市代表將會喺八月遷移至其他證券交易枱。