Market Insight：雅士利便宜莫貪

內地貿易數據拖累，港股與內地股市雙雙腳軟，六月內地出口增長11.3%，比預期10.6%高，如果以一至五月份累積8.7%增長比較，亦唔算曳，但進口增長6.3%，唔及五月份12.7%一半，同投行預測增長11%有段距離，反映內地進口需求減少，加埋PPI已經連續四個月出現負增長，估計中國短期面對通縮重臨的風險要比通脹重燃大，減存備率同減息的行動相信仲會陸續有來。

隨着更多中國第二季經濟數據教人失望，愈來愈多名嘴開始認低威話睇錯市，亦將復甦預期押後到第三甚至第四季至出現，加埋歐洲央行解決歐豬國債務危機，顯得唔湯唔水，意、西十年國債息持續貼實6、7厘警戒線水平，壓抑基金風險胃納，四圍搵安全兼高息的股份泊住先，集中本地電訊業務的和電（00215）及數碼通（00315），終於發威，現價計預期股息率仲有4.3及5.7厘，在避險情緒持續下，短期相信是易升難跌。

放大圖片

放大圖片

另外，受惠內地通脹及食品價格回落的快餐股，都見追捧，心水股大快活（00052）創超過十年新高，估值仍處歷史高位，揸貨的未必要即市食胡，但要買上去，就要相當大的勇氣。

基金買REIT愛夠大

隨着基金價格創新高，領匯（00823）預期息率大約4厘，本來管理私人屋苑商場的置富產業信託（00778）都唔錯，一樣純本地生意，較唔受外圍經濟風高浪急拖累，不過基金掃貨向來唔大唔買，市值細難免吃虧啲啲。

經濟前景一片迷濛，唔少公司索性把發展計劃打住，將資金作其他出路。中國龍工（03339）斥資643.5萬美元，回購519萬美元可換股債券，減少一四年到期被行使後的攤薄，變相回購，多少反映今年跌近三成的龍工，股價在管理層心目中經已差不多。

中期業績表現堪憂

奶粉股雅士利（01230）一年多前上市集資23億元，睇去年年報，一筆1.8億元的「其他投資」外，廿多億現金曬緊太陽，昨日公司話將唔超過5億元人民幣集資回來的款項，用作短期保本產品投資，另外，非發新股所得15億元人民幣也會投資在一年內到期的保本產品。

唔經唔覺，雅士利由招股價4.2元，三碗煲埋一碗水得番1.24元。以手上25.8億元淨現金，每股有0.73元，相當於現價近七成係現金。一葉知秋，來香港同胞買LV少咗，奶粉卻依然搶手，內地消費者對內地奶粉信心有幾低，即使貴為內地五大品牌，雅士利不改上市走樣法則，去年少賺39%得3.06億元人民幣，撇除大額存款收息所得，實質仲要跌47%。

價值投資者可能覺得抵買，剔除現金後PE得2、3倍，不過保本投資係咪真係保本？八月份中期業績到底有幾差？實在教人摸不着頭腦。光棍佬教仔便宜莫貪，真係忍唔到手，古勝建議都只宜細細注。

創板股同股唔同命

時值業績期，唔少企業都預先響定警鐘，只係估唔到連公用股中電（00002）都變相發盈警。事緣公司通告指，旗下澳洲煤礦受水浸影響，估計一二年財務業績將受不利影響，故見昨日股價跌逾2%，唔排除嚟緊股價會跑輸同類股。

此外，創板股恒芯中國（08046）上月證實轉板申請已失效，重新申請又遭聯交所駁回，股價頓失支持，由0.6元插到落昨日低位僅剩0.231元，累計跌六成，市值蒸發約10億元，往績市盈率得番兩倍多啲，睇走勢真係唔多樂觀。

反觀同樣係創板股，上月亦宣布轉板申請已失效嘅新意網（08008），股價卻由六月初嘅1元水平飆到上昨日高位見1.58元，表現真係天同地，但解讀股價炒高嘅理由不外乎又係傳聞私有化之類嘅舊聞新炒，講白啲係其背靠藍籌地主股嘅優勢可以讓炒家放心炒！

古勝