上星期阿爺「突然」減息，其實都唔突然，因為年初各大投行預測由三至七次不等，減息令靠佢交數嘅內銀股應聲下跌，大戶細戶梗係先沽為敬啦！內房股就突然炒到飛起，都咪話唔厲害。
不過，全世界都狂煲內房股，盛高置地（00337）卻逆市而行，公司發盈警，市場梗係嚇一跳。大家都知過去幾年內房股面對住首期增加、限購令，加上不斷有內房地產公司被降評級，令到佢哋經營環境真係好惡劣。根據中國指數研究院二○一二年全國土地出讓人仔收入為6,256億元，較上年跌38%，阿爺一樣係收少咗錢！
盛高做唔好其中嘅原因，唔使講梗係銷售放緩影響公司表現，去年同期都係得嗰1億元，睇個勢真係難搞，本身已經唔標青，同行好似首創置業（02868）同保利香港（00119）都有雙位數增長，「寧舍差」之名，當之無愧。再睇真啲，原來盛高中咗房地產三大地雷之一限購令，因為盛高嘅項目大部分都喺長江三角限購令重災區，真係想賣樓都賣唔到幾多。佢負債雖然唔算好高，但短期現金又真係「窄窄哋」，加上評級公司又將佢評級下調，呢次真係屋漏兼逢連夜雨，無計可施，啱啱賣咗無錫地皮畀恒大（03333）許生，套現11.8億元，較市場估值仲要低。
內房股可唔可以回暖，實在言之尚早，溫總亦講明會繼續樓市調控，睇吓今年阿爺換班再作打算。但係要博，都係要搵大隻嘅來博，例如雅居樂（03383）或者恒大，繼續追蹤，出發！
香港大學電子金融服務榮譽助理教授 徐燦傑