過百萬嘅歐洲名車一向都係城中富豪追捧嘅恩物，有富豪朋友近日就同金占士講，呢期富豪圈興起一種名車新玩法，就係自己或者夾份開間車行，入口啲名車，掛俗稱「T牌」嘅試車牌，試完一輪再賣番出去。有車會啲人士就話，用呢個方法「試」車慳番唔少首次登記稅，不過呢排大家玩得愈嚟愈高調觸動到執法部門加強咗執法。
試諗吓依家出名嘅雙門跑車入場費閒閒哋成四五百萬蚊，加上舊年政府加咗首次登記稅一成半，富豪用呢個方法玩車的確慳咗唔少首次登記稅，而且成日可以揸吓唔同款嘅車，大有新鮮感。
就好似金占士啲靚女朋友咁，幾乎日日着唔同衫，甚至有女友人講笑咁話，唔使開間時裝店，自己試着一日半日，然後賣番出去，最後佢有冇咁做金占士唔知，但最好唔好啦，咁唔衞生。
有車會人士就同金占士講，有啲富豪玩得愈嚟愈高調，甚至將個「T牌」號碼噴埋上車度，令到運輸署等嘅部門開始警惕，仲話最近相關部門同業界傾緊推出啲措施針對呢個情況。佢仲話，汽車全保同第三者保險嘅保費相差幾千元至過萬元，有啲車行諗住都係試吓玩吓就轉手，可能會只係買份第三者保險就算數，萬一出咗事乘客分分鐘唔受保障。
金占士