歌仔有唱，「寧願少吃餐，時裝錢咪慳」，絲絲尋日睇完一份報告，即興改歌詞，「寧願少吃餐，遊埠錢咪慳」。原來好多人明知經濟唔多好，但反而打算增加旅遊開支預算，延長今個夏季嘅旅遊行程，當中又以中國內地嘅旅客更甚，經濟學家嘅溫馨提示，似乎大家唔多聽。
個報告係溫德姆酒店集團做嘅，佢哋訪問咗5,600位分別嚟自中國大陸、英國、美國、加拿大同巴西等地嘅成年人。半數以上（58%）中國旅客計劃增加今年嘅度假開支預算，有同樣想法嘅美國受訪者就只有27%，英國及加拿大更低至24%。
受訪者當中，接近六成打算今年撥出額外開支預算用嚟延長旅程。如果budget有限，會唔會放棄度假？願意咁做嘅人只有24%，結果真係令絲絲意外，原來佢哋寧願少啲幫襯高級餐廳，或者少啲外出用膳，都堅持要去旅行。
絲絲見好多嚟香港旅遊嘅「內地自由行」，都唔多願意花錢租酒店，留返啲錢shopping，但呢個報告就話，喺預訂名牌酒店時，24%嘅大陸旅客打算付出更多金錢租住名牌酒店，至於有呢個打算嘅美國、英國、加拿大及巴西受訪者，平均只有14%。