電盈（00008）主席李澤楷與新聞集團（Newscrop）主席梅鐸，都可謂「歡喜冤家」，繼早年本港衞視（現稱星空傳媒）嘅投資、千禧年對香港電訊嘅爭奪戰，雙方在now TV品牌專利權再起爭端，甚至可能要對簿公堂！
now品牌對李澤楷來說可謂是親生仔，事關呢個名係沿於佢嘅「network of the world」——全球多媒體業務嘅宏願，後來更銳變為今日嘅now TV。
新聞集團旗下英國Sky，喺今年三月公布將以「NOW TV」為品牌，於英國推出新一代寬頻電視服務，Sky最近仲以7.6億英鎊嘅天價，再次購入英超喺英國嘅播放權，用嚟省靚招牌。
據英國廣播業刊物《Broadcast》嘅報道，電盈得知Sky嘅「NOW TV」品牌計劃後，已透過旗下公司尋求向Sky開展法律行動。佢嘅主要理據，係電盈早已喺英國將now嘅品牌同相關設計，作為電訊及廣播服務嘅註冊商標，並曾兩度用呢個品牌喺英國提供服務。再加上Sky旗下嘅新聞頻道早喺○五年開始，已經喺本港now TV播放，所以電盈認為Sky無理由唔知有呢個名嘅存在。而Sky對繼續使用「NOW TV」品牌極具信心，又話正按計劃喺夏季推出呢項新服務，電盈最終能否繼續獨佔「now」呢個招牌，就要睇今年十月嘅聆訊喇。