獅子山下嘅奮鬥故事真係講都講唔完，好似啱啱上任會計師公會行政總裁一職嘅丁偉銓咁，大家當然清楚佢喺會計界享負盛名，不過喺進身成功人士以前，佢捱咗好多苦，有一個堪稱波折重重嘅童年。
佢喺公會旗下刊物《A PLUS》透露咗佢童年係點過。佢話自己喺西營盤長大，細細個時家境唔太好，爸爸喺佢六歲嘅時候患了重病，十歲嘅時候爸爸就過身，一家人只好喺西營盤過住節衣縮食嘅日子。丁家八個子女之中，得佢一粒仔，所以丁偉銓啲姊妹好錫佢。佢五位姐姐早早就輟學出嚟社會工作，供佢讀書，媽媽就做兼職幫補家計。丁偉銓亦都無令家人失望，順利入讀港島名校英皇書院。
入咗英皇，佢以為好快可以入U讀法律，點知高考成績麻麻，讀唔成法律。佢記番起兩年前喺會計師樓打過工，認為自己都可以入呢行。
當時佢有兩條路揀，一係入讀理工，攞番個會計系高級文憑，一係去英國讀書，攞會計學士名銜，最終揀咗去英國。
丁偉銓話，艱苦嘅成長環境，係成就佢堅定而公正品格嘅因素之一，作為會計師公會新任行政總裁，喺服務會員與社會大眾之間，會力求平衡雙方嘅利益，而佢嘅其他重任，仲包括業界嘅監管改革以及推動核數師審計責任改革等。
余詩韻