每日行入港鐵車廂，都唔難見到有人拎住部電話喺度打機。絲絲就唔係好明，電話個螢幕咁細，點解你哋咁鍾意用電話打機呢？其實呢個「病」係全球通行嘅，包括內地同胞在內。
絲絲最近睇過一間市場研究公司Niko Partners發表嘅最新報告，內容就預測到年底為止，內地嘅移動遊戲玩家會達到1.92億人，呢個數目比內地電腦遊戲嘅玩家仲要多！而且喺未來五年，內地移動遊戲市場嘅收入估計會增長到36億美元，比2011年多出六倍。
Niko Partners個管理合夥人利薩‧科斯莫斯‧漢森話，佢哋公司預計，內地多咗人使用3G網絡、智能手機銷量又大幅上升，加上遊戲價格相對便宜同玩家嘅需求，都有助推動市場嘅收入迅速增長。
絲絲知道，市場上暫時未有明顯主導嘅遊戲公司，但佢哋都唔肯放棄大好機會，爭相將自己嘅遊戲交付到不同嘅平台，希望可以接觸多啲玩家。到底最後邊間公司會跑出，絲絲真係拭目以待喇。