一字之錯 相差萬倍
話說呢間公司叫寧夏恆力，佢嘅董事長同股東喺公司進行重組期間，不停買賣公司嘅股票，仲分別賺咗十三萬同四十一萬，呢件事畀證監會發現咗之後，就罰佢哋錢。寧夏恆力喺發布最初公告嗰時，話畀證監會罰咗十五億。十五億？絲絲翻查資料，成間公司市值都只係得十六億，罰款竟然佔成間公司市值嘅百分之九十三？
非也非也，原來係寧夏恆力搞錯，喺公告罰款數字後面，打多咗個萬，變成「十五萬萬」。
睇番證監會以前啲紀錄，最高罰款額都只係三百萬左右，今次十五億好似誇張咗啲喎，唔怪之得啲股民睇到眼都凸，嘩嘩聲。佢哋咁烏龍，唔知有冇股民即刻沽咗貨，然後又追究公司呢？