耀才證券（01428）尋日喺主席葉茂林個場，搞iBond發行慶功宴，絲絲唔係好明佢哋為乜要為iBond慶功，經過葉茂林講解，即刻明白晒，原來係因為iBond呢個產品為佢哋增添三千個新客。
個慶功宴係喺葉茂林自己經營嘅的士高Magnum Club搞嘅，除咗耀才嘅員工之外，仲廣邀行家同埋傳媒朋友。
絲絲去到見到果然有唔少財金名人都嚟到捧場，好似黃偉康、藺常念、黃德几等等，喺主場嘅郭sir郭思治，自然落力幫手招呼賓客。
iBond搞得有聲有色，絲絲都認購咗幾手。葉茂林話耀才喺iBond發售嘅短短兩個星期內，吸引咗成六千個客選擇用耀才認購，當中有一半仲係新客，佢見班員工喺嗰期晚晚做到成十一、二點先至有得收工，點都要慰勞吓班同事。
葉茂林依家經營緊三間的士高，尋日用嚟慶功嘅Magnum Club都只係開業一年多啲，旺丁又旺財，佢就最鍾意間吧落點夠就腳，仲邀請絲絲多啲嚟relax吓添。
所以話葉老闆真係好有生意諗頭，以今次慶功為例，又可以宣傳吓耀才努力開拓客源嘅成果，耀才依家供緊股，咁樣可以畀到投資者多啲信心，又可以借機會宣傳埋旗下嘅的士高生意，稱得上係一箭雙雕。
余詩韻